ປັດຊະຍາ
ພ້ອມໃຊ້ງານທັນທີ (Out of the box)
ຊອບແວທີ່ດີຄວນເຮັດວຽກໄດ້ໂດຍການຕັ້ງຄ່າພຽງເລັກໜ້ອຍ. WordPress ຖືກອອກແບບມາໃຫ້ທ່ານເລີ່ມຕົ້ນໃຊ້ງານໄດ້ພາຍໃນຫ້ານາທີ.
ພວກເຮົາເຮັດວຽກຢ່າງໜັກເພື່ອຮັບປະກັນວ່າທຸກໆເວີຊັນເປັນໄປຕາມປັດຊະຍານີ້. ພວກເຮົາຈະຂໍຂໍ້ມູນທາງເຕັກນິກໃຫ້ໜ້ອຍທີ່ສຸດໃນລະຫວ່າງການຕິດຕັ້ງ ແລະ ຈະມີຄຳອະທິບາຍຢ່າງຄົບຖ້ວນສຳລັບທຸກຢ່າງທີ່ພວກເຮົາຖາມ.
ອອກແບບມາເພື່ອຄົນສ່ວນໃຫຍ່
ຜູ້ໃຊ້ສ່ວນໃຫຍ່ບໍ່ໄດ້ເກັ່ງດ້ານເຕັກນິກ. ເຂົາເຈົ້າພຽງແຕ່ຕ້ອງການຂຽນເນື້ອຫາໂດຍບໍ່ມີບັນຫາ. ນີ້ຄືກຸ່ມຜູ້ໃຊ້ທີ່ພວກເຮົາອອກແບບຊອບແວມາໃຫ້.
ການຕັດສິນໃຈ, ບໍ່ແມ່ນທາງເລືອກ (Decisions, not options)
ເມື່ອຕ້ອງຕັດສິນໃຈ, ເຮົາຈະນຶກເຖິງຜູ້ໃຊ້ທົ່ວໄປເປັນອັນດັບທຳອິດ. ມັນເປັນໜ້າທີ່ຂອງນັກພັດທະນາທີ່ຈະຕ້ອງຕັດສິນໃຈອອກແບບໃຫ້ສະຫຼາດ ແລະ ບໍ່ຄວນເອົາພາລະການຕັດສິນໃຈທາງເຕັກນິກໄປໃຫ້ຜູ້ໃຊ້ທົ່ວໄປ.
ສະອາດ, ກະທັດຮັດ ແລະ ມີປະສິດທິພາບ
ລະບົບຫຼັກຂອງ WordPress ຈະມີຄຸນສົມບັດພື້ນຖານທີ່ຈຳເປັນສະເໝີ. ກົດພື້ນຖານແມ່ນ ລະບົບຫຼັກຄວນມີຄຸນສົມບັດທີ່ຜູ້ໃຊ້ 80% ຫຼື ຫຼາຍກວ່ານັ້ນຈະໄດ້ນຳໃຊ້ແທ້ໆ.
ພວກເຮົາສາມາດເຮັດສິ່ງນີ້ໄດ້ຍ້ອນພວກເຮົາມີລະບົບທີມ ແລະ ປລັກອິນທີ່ມີປະສິດທິພາບ ລວມທັງຊຸມຊົນນັກພັດທະນາທີ່ຍອດຢ້ຽມ. ແຕ່ລະຄົນມີຄວາມຕ້ອງການທີ່ແຕກຕ່າງກັນ, ການທີ່ມີປລັກອິນ ແລະ ທີມ ທີ່ມີຄຸນນະພາບເປັນຈຳນວນຫຼາຍ ຊ່ວຍໃຫ້ຜູ້ໃຊ້ສາມາດປັບແຕ່ງຕາມຄວາມມັກໄດ້. ສິ່ງນີ້ຊ່ວຍໃຫ້ຜູ້ໃຊ້ສາມາດຄົ້ນຫາ 20% ທີ່ເຫຼືອ ແລະ ເຮັດໃຫ້ທຸກຄຸນສົມບັດຂອງ WordPress ເປັນສິ່ງທີ່ພວກເຂົາພໍໃຈ ແລະ ໄດ້ໃຊ້ງານແທ້ໆ.
ມຸ່ງໝັ້ນສູ່ຄວາມລຽບງ່າຍ
ພວກເຮົາບໍ່ເຄີຍຢຸດພັດທະນາຄວາມລຽບງ່າຍ. ພວກເຮົາຕ້ອງການໃຫ້ WordPress ໃຊ້ງານງ່າຍຂຶ້ນໃນທຸກໆເວີຊັນ.
ໃນເວີຊັນທີ່ຜ່ານມາ, ພວກເຮົາໄດ້ພັດທະນາໃຫ້ການນຳໃຊ້ງ່າຍຂຶ້ນ. ຕົວຢ່າງທີ່ຊັດເຈນແມ່ນການອັບເດດຊອບແວຫຼັກ ເຊິ່ງເມື່ອກ່ອນເປັນເລື່ອງທີ່ຍາກ, ແຕ່ດຽວນີ້ພຽງແຕ່ຄລິກດຽວກໍສາມາດອັບເກຣດໄດ້ທັງລະບົບຫຼັກ, ປລັກອິນ ແລະ ທີມ.
ພວກເຮົາມັກທີ່ຈະທ້າທາຍຕົນເອງ ແລະ ເຮັດໃຫ້ວຽກຕ່າງໆງ່າຍຂຶ້ນໃນຮູບແບບທີ່ສົ່ງຜົນດີຕໍ່ປະສົບການຜູ້ໃຊ້ໂດຍລວມ. ທຸກໆເວີຊັນຂອງ WordPress ຄວນຈະໃຊ້ງ່າຍ ແລະ ໜ້າໃຊ້ຫຼາຍຂຶ້ນກວ່າເວີຊັນກ່ອນ.
ກຳນົດເວລາບໍ່ໄດ້ຖືກຕັ້ງຂຶ້ນແບບລອຍໆ
ກຳນົດເວລາບໍ່ໄດ້ຖືກຕັ້ງຂຶ້ນແບບລອຍໆ, ແຕ່ມັນຄືສັນຍາທີ່ພວກເຮົາໃຫ້ໄວ້ກັບຕົນເອງ ແລະ ຜູ້ໃຊ້. ພວກເຮົາຕັ້ງເປົ້າໝາຍທີ່ຈະປ່ອຍສາມເວີຊັນຫຼັກຕໍ່ປີ ເພາະເຮົາພົບວ່າມັນເປັນຄວາມສົມດຸນທີ່ດີ.
ກຳນົດເວລາທີ່ດີມັກຈະເຮັດໃຫ້ທ່ານຕ້ອງຕັດບາງຢ່າງອອກຈາກເວີຊັນນັ້ນ. ນີ້ບໍ່ແມ່ນເລື່ອງບໍ່ດີ, ມັນແມ່ນສິ່ງທີ່ຄວນຈະເປັນ.
ການເລື່ອນການປ່ອຍເວີຊັນເພື່ອລໍຖ້າພຽງແຕ່ຄຸນສົມບັດດຽວແມ່ນຄືກັບການຫຼົງເຂົ້າໄປໃນຮູກະຕ່າຍ. ພວກເຮົາເຄີຍເຮັດແບບນັ້ນເປັນເວລາຫຼາຍກວ່າໜຶ່ງປີ, ແລະ ມັນບໍ່ແມ່ນເລື່ອງທີ່ດີສຳລັບໃຜເລີຍ.
ຍິ່ງມີການປ່ອຍເວີຊັນໃໝ່ເລື້ອຍໆ ແລະ ເປັນປົກກະຕິເທົ່າໃດ, ຄວາມຈຳເປັນທີ່ຈະຕ້ອງເອົາຄຸນສົມບັດໃດໜຶ່ງໃສ່ໃນເວີຊັນນັ້ນກໍຈະໜ້ອຍລົງ. ການເລື່ອນເວລາຈະເຮັດໃຫ້ເກີດການເລື່ອນເວລາຕໍ່ໄປເລື້ອຍໆ.
ສຽງສ່ວນນ້ອຍທີ່ດັງກວ່າ
ມີກົດພື້ນຖານໃນວັດທະນະທຳອິນເຕີເນັດທີ່ເອີ້ນວ່າ ກົດ 1% ເຊິ່ງລະບຸວ່າ “ຈຳນວນຜູ້ສ້າງເນື້ອຫາໃນອິນເຕີເນັດມີພຽງແຕ່ປະມານ 1% (ຫຼື ໜ້ອຍກວ່າ) ຂອງຈຳນວນຜູ້ທີ່ເຂົ້າເບິ່ງເນື້ອຫາເຫຼົ່ານັ້ນແທ້ໆ”.
ດັ່ງນັ້ນ, ໃນຂະນະທີ່ພວກເຮົາໃຫ້ຄວາມສຳຄັນກັບການຮັບຟັງ ແລະ ຕອບສະໜອງຕໍ່ຜູ້ທີ່ສະແດງຄວາມຄິດເຫັນໃນຟໍຣຳ, ແຕ່ພວກເຂົາກໍເປັນພຽງສ່ວນນ້ອຍໆຂອງຜູ້ໃຊ້ທັງໝົດ. ໃນການຕັດສິນໃຈກ່ຽວກັບທິດທາງຂອງ WordPress ເວີຊັນໃໝ່, ພວກເຮົາພະຍາຍາມມີສ່ວນຮ່ວມກັບຜູ້ໃຊ້ທີ່ບໍ່ໄດ້ສະແດງອອກທາງອອນລາຍນຳ. ພວກເຮົາເຮັດສິ່ງນີ້ໂດຍການພົບປະ ແລະ ເວົ້າລົມກັບຜູ້ໃຊ້ໃນງານ WordCamp ທົ່ວໂລກ ເພື່ອໃຫ້ເກີດຄວາມເຂົ້າໃຈທີ່ສົມດຸນ ແລະ ຊ່ວຍໃຫ້ພວກເຮົາຕັດສິນໃຈໄດ້ດີຂຶ້ນສຳລັບທຸກຄົນ.
ຖະແຫຼງການສິດທິຂອງພວກເຮົາ
WordPress ໄດ້ຮັບອະນຸຍາດພາຍໃຕ້ໃບອະນຸຍາດສາທາລະນະທົ່ວໄປ (GPLv2 ຫຼື ໃໝ່ກວ່າ) ເຊິ່ງມອບເສລີພາບຫຼັກສີ່ປະການ, ໃຫ້ຖືວ່ານີ້ແມ່ນ “ຖະແຫຼງການສິດທິ” ຂອງ WordPress:
- ເສລີພາບໃນການໃຊ້ງານໂປຣແກຣມ ເພື່ອຈຸດປະສົງໃດໆກໍຕາມ.
- ເສລີພາບໃນການສຶກສາວິທີການເຮັດວຽກຂອງໂປຣແກຣມ ແລະ ປ່ຽນແປງມັນໃຫ້ເຮັດວຽກຕາມທີ່ທ່ານຕ້ອງການ.
- ເສລີພາບໃນການແຈກຢາຍຕໍ່.
- ເສລີພາບໃນການແຈກຢາຍສຳເນົາຂອງເວີຊັນທີ່ທ່ານໄດ້ດັດແກ້ໃຫ້ແກ່ຜູ້ອື່ນ.
ສ່ວນໜຶ່ງຂອງຂໍ້ກຳນົດຂອງໃບອະນຸຍາດເຫຼົ່ານັ້ນ ລວມເຖິງການກຳນົດໃຫ້ຜົນງານທີ່ຕໍ່ຍອດມາ ຫຼື ສິ່ງທີ່ເຊື່ອມຕໍ່ກັບຟັງຊັນຫຼັກຂອງ WordPress (ເຊັ່ນ ທີມ, ປລັກອິນ ແລະ ອື່ນໆ) ຕ້ອງຢູ່ພາຍໃຕ້ໃບອະນຸຍາດ GPL ນຳເຊັ່ນກັນ ເພື່ອເປັນການສົ່ງຕໍ່ເສລີພາບໃນການນຳໃຊ້ສຳລັບຜົນງານເຫຼົ່ານີ້.
ແນ່ນອນວ່າຈະມີຜູ້ທີ່ພະຍາຍາມຫຼີກລ່ຽງອຸດົມການເຫຼົ່ານີ້ ແລະ ຈຳກັດເສລີພາບຂອງຜູ້ໃຊ້ ໂດຍການພະຍາຍາມຊອກຫາຊ່ອງໂຫວ່ ຫຼື ຫາທາງຫຼົບຫຼີກເຈດຈຳນົງຂອງການອອກໃບອະນຸຍາດ WordPress ເຊິ່ງມີໄວ້ເພື່ອຮັບປະກັນເສລີພາບໃນການນຳໃຊ້. ພວກເຮົາເຊື່ອວ່າຊຸມຊົນໂດຍລວມຈະສະໜັບສະໜູນຜູ້ທີ່ໃຫ້ຄວາມສຳຄັນກັບເສລີພາບເຫຼົ່ານີ້ ແທນທີ່ຈະເປັນຜູ້ທີ່ພະຍາຍາມຫຼີກລ່ຽງມັນ.
ຊຸມຊົນ WordPress ຄວນເນັ້ນໜັກວ່າສິດເສລີພາບໃນ GPL ຊ່ວຍໃຫ້ໄດ້ຊອບແວທີ່ມີຄຸນນະພາບສູງ.